မိုးကြိုးပစ်ခံရသောကြောင့် ဆိုင်ကယ်အရောင်းဆိုင် မီးလောင်ကာ ဆိုင်ဝန်ထမ်းမိန်းကလေးနှစ်ဦးသေဆုံး
မိုးကောင်း – ဩဂုတ် ၂၇၊ ၂၀၂၂။
မိုးကြိုးပစ်ခံရသောကြောင့် ဆိုင်တစ်ဆိုင် မီးလောင်မှုဖြစ်ပွားရာမှ အမျိူးသမီးနှစ်ဦး သေဆုံးခဲ့သည့်ဖြစ်စဉ် ယမန်နေ့ည ၁၀နာရီခန့်က မိုးကောင်းမြို့တွင် ဖြစ်ပွားခဲ့ကြောင်း သိရသည်။
မိုးကောင်းမြို့၊ ကျွန်းတောရပ်ကွက်၊ ဖိုးချစ်ကုန်းအပိုင်းရှိ ငွေချမ်းမြေ့ဆိုင်ကယ်ရောင်းဝယ်ရေးဆိုင် မီးလောင်ကျွမ်းမှုကြောင့်ဆိုင်ဝန်ထမ်းအမျိူးသမီးနှစ်ဦး မီးထဲပိတ်မိပြီး အသက်ဆုံးရှုံးခဲ့ရကြောင်း ဒေသခံသတင်းရင်းမြစ်တစ်ဦးက The 74 Media ကိုပြောသည်။
“အပေါ်ထပ်မှာ အိပ်တဲ့ကောင်မလေးတွေပါသွားတယ်။ သူကအောက်ဆင်းဖို့ဟာ လှေကားက မီးလောင်နေတယ်။ ပြတင်းပေါက်တွေကလည်း သံတိုင်တွေနဲ့ဆိုတော့ ဆင်းမရဖြစ်သွားတယ်ထင်တယ်” ဟုပြောသည်။
သေဆုံးသွားသော အမျိုးသမီးနှစ်ဦးမှာ အသက် ၂၃နှစ်အရွယ် မဝေမာအောင်နှင့် ၂၁နှစ်အရွယ် မအိအိသက်တို့ဖြစ်ပြီး နမ္မတီးမြို့နှင့် ဆားမှော်ကျေးရွာမှ အလုပ်လာရောက်လုပ်ကိုင်သူ နှစ်ဦးဖြစ်ကြောင်းသူကပြောသည်။
ကျယ်လောင်သော မိုးကြိုးပစ်သံ ထွက်ပေါ်လာပြီးနောက် ဆိုင်ကယ်ဆိုင် အောက်ထပ်မှ စတင်လောင်ကျွမ်းခဲ့ခြင်းဖြစ်ကြောင်း မိုးကောင်းဒေသခံ အမျိုးသားတစ်ဦးက ဆက်ပြောသည်။
“မိုးကြိုးပစ်တဲ့အသံအကျယ်ကြီးကြားလိုက်ရတာ ။အဲ့မှာ ငွေချမ်းမြေ့ ဆိုင်ကယ်အရောင်းဆိုင် အောက်ထပ်ကနေ လျှပ်စီးဝင်ပြီး shock ဖြစ်တယ်ထင်တယ် ညော်နံ့တွေအရမ်းရလာပြီး အောက်ထပ်ဆိုင်ကယ်ထားတဲ့နေရာက စပေါက်ကွဲ ပြီးလောင်တော့တာပဲ “ ဟုပြောသည်။
မီးလောင်ကျွမ်းမှုကြောင့် ဆိုင်အတွင်းရှိ ဆိုင်ကယ်များနှင့် စက်ပစ္စည်းများအားလုံး မီးလောင်ကျွမ်းသွားကြောင်း သိရသည်။
ပြီးခဲ့သည့် ဇူလိုင်လ ၈ ရက်နေ့ကလည်း မိုးကောင်းဒေသ နမ္မတီးမြို့အနီး လယ်ကွင်းတစ်နေရာအား မိုးကြိုးပစ်ရာ လယ်တဲအတွင်းရှိ နွား ၂၄ကောင် သေဆုံးခဲ့သည်။Crd.
Photo – CJ credit
